Rigveda Sukta 5.1 >
५,००१.०१ अबोध्यग्निः समिधा जनानां प्रति धेनुमिवायतीमुषासम् ।
५,००१.०१ यह्वा इव प्र वयामुज्जिहानाः प्र भानवः सिस्रते नाकमच्छ ॥
५,००१.०२ अबोधि होता यजथाय देवानूर्ध्वो अग्निः सुमनाः प्रातरस्थात् ।
५,००१.०२ समिद्धस्य रुशददर्शि पाजो महान्देवस्तमसो निरमोचि ॥
५,००१.०३ यदीं गणस्य रशनामजीगः शुचिरङ्क्ते शुचिभिर्गोभिरग्निः ।
५,००१.०३ आद्दक्षिणा युज्यते वाजयन्त्युत्तानामूर्ध्वो अधयज्जुहूभिः ॥
५,००१.०४ अग्निमच्छा देवयतां मनांसि चक्षूंषीव सूर्ये सं चरन्ति ।
५,००१.०४ यदीं सुवाते उषसा विरूपे श्वेतो वाजी जायते अग्रे अह्नाम् ॥
५,००१.०५ जनिष्ट हि जेन्यो अग्रे अह्नां हितो हितेष्वरुषो वनेषु ।
५,००१.०५ दमेदमे सप्त रत्ना दधानोऽग्निर्होता नि षसादा यजीयान् ॥
५,००१.०६ अग्निर्होता न्यसीदद्यजीयानुपस्थे मातुः सुरभा उ लोके ।
५,००१.०६ युवा कविः पुरुनिष्ठ ऋतावा धर्ता कृष्टीनामुत मध्य इद्धः ॥
५,००१.०७ प्र णु त्यं विप्रमध्वरेषु साधुमग्निं होतारमीळते नमोभिः ।
५,००१.०७ आ यस्ततान रोदसी ऋतेन नित्यं मृजन्ति वाजिनं घृतेन ॥
५,००१.०८ मार्जाल्यो मृज्यते स्वे दमूनाः कविप्रशस्तो अतिथिः शिवो नः ।
५,००१.०८ सहस्रशृङ्गो वृषभस्तदोजा विश्वां अग्ने सहसा प्रास्यन्यान् ॥
५,००१.०९ प्र सद्यो अग्ने अत्येष्यन्यानाविर्यस्मै चारुतमो बभूथ ।
५,००१.०९ ईळेन्यो वपुष्यो विभावा प्रियो विशामतिथिर्मानुषीणाम् ॥
५,००१.१० तुभ्यं भरन्ति क्षितयो यविष्ठ बलिमग्ने अन्तित ओत दूरात् ।
५,००१.१० आ भन्दिष्ठस्य सुमतिं चिकिद्धि बृहत्ते अग्ने महि शर्म भद्रम् ॥
५,००१.११ आद्य रथं भानुमो भानुमन्तमग्ने तिष्ठ यजतेभिः समन्तम् ।
५,००१.११ विद्वान्पथीनामुर्वन्तरिक्षमेह देवान्हविरद्याय वक्षि ॥
५,००१.१२ अवोचाम कवये मेध्याय वचो वन्दारु वृषभाय वृष्णे ।
५,००१.१२ गविष्ठिरो नमसा स्तोममग्नौ दिवीव रुक्ममुरुव्यञ्चमश्रेत् ॥
Rigveda Hymn 5.1 >
RV_05.001.01.1 abodhy agnih samidha jananam prati dhenum ivayatim usasam
RV_05.001.01.2 yahva iva pra vayam ujjihanah pra bhanavah sisrate nakam acha
RV_05.001.02.1 abodhi hota yajathaya devan urdhvo agnih sumanah pratar asthat
RV_05.001.02.2 samiddhasya rusad adarsi pajo mahan devas tamaso nir amoci
RV_05.001.03.1 yad im ganasya rasanam ajigah sucir ankte sucibhir gobhir agnih
RV_05.001.03.2 ad daksina yujyate vajayanty uttanam urdhvo adhayaj juhubhih
RV_05.001.04.1 agnim acha devayatam manamsi caksumsiva surye sam caranti
RV_05.001.04.2 yad im suvate usasa virupe sveto vaji jayate agre ahnam
RV_05.001.05.1 janista hi jenyo agre ahnam hito hitesv aruso vanesu
RV_05.001.05.2 dame-dame sapta ratna dadhano ‘gnir hota ni sasada yajiyan
RV_05.001.06.1 agnir hota ny asidad yajiyan upasthe matuh surabha uloke
RV_05.001.06.2 yuva kavih purunistha rtava dharta krstinam uta madhya iddhah
RV_05.001.07.1 pra nu tyam vipram adhvaresu sadhum agnim hotaram ilate namobhih
RV_05.001.07.2 a yas tatana rodasi rtena nityam mrjanti vajinam ghrtena
RV_05.001.08.1 marjalyo mrjyate sve damunah kaviprasasto atithih sivo nah
RV_05.001.08.2 sahasrasrngo vrsabhas tadoja visvam agne sahasa prasy anyan
RV_05.001.09.1 pra sadyo agne aty esy anyan avir yasmai carutamo babhutha
RV_05.001.09.2 ilenyo vapusyo vibhava priyo visam atithir manusinam
RV_05.001.10.1 tubhyam bharanti ksitayo yavistha balim agne antita ota durat
RV_05.001.10.2 a bhandisthasya sumatim cikiddhi brhat te agne mahi sarma bhadram
RV_05.001.11.1 adya ratham bhanumo bhanumantam agne tistha yajatebhih samantam
RV_05.001.11.2 vidvan pathinam urv antariksam eha devan haviradyaya vaksi
RV_05.001.12.1 avocama kavaye medhyaya vaco vandaru vrsabhaya vrsne
RV_05.001.12.2 gavisthiro namasa stomam agnau divnva rukmam uruvyancam asret
